समायोजन खबर पाँचथर,
पाँचथरको सुख्खाग्रष्त क्षेत्र कुम्मायक गाउँपालिकामा डिप बोरिङ प्रविधिबाट पानी निकालेर उपभोक्तालाई दिन शुरु गरिएको छ । डिप बोरिङ परिक्षण गरिएको पाँच मध्ये तीन स्थानबाट खानेपानी वितरण गर्न शुरु गरिएको हो । एक नम्बर प्रदेश सरकारको एक करोड ६० लाख लागतमा गाउँपालिकाको पाँच स्थानमा डिप बोरिङको सफल परिक्षण गरिएको थियो ।

डिप बोरिङबाट पानी वितरण गर्न थालेपछि स्थानीय भने खुसी भएका छन् । अब पहिले जस्तो रातको एक बजेदेखि नै पानीको जोहोमा लाग्नुपर्ने बाध्यता हटेको छ । घन्टौं लाग्ने बाटो हिंडेर पानी लिन जानुपर्दा विद्यार्थीहरु समयमै विद्यालय नआउने समस्या पनि अब हट्ने अपेक्षा गरिएको स्थानीय विद्यालय प्रशासनले गरेको छ । डिप बोरिङ परिक्षण गरिएको मल्लिडे, उत्तिसे र गोलेडाँडाबाट पानी वितरण सुरु गरिएको हो । रानीगाउँ र बिजुवापानीबाट भने पानी वितरण हुन बाँकी रहेको डिप बोरिङ खानेपानी व्यवस्थापन समितिका अध्यक्ष मेघराज निरौलाले जानकारी दिनुभयो ।

कुम्मायक गाउँपालिकालाई नेपाल सरकारले २०६६ सालमा सुख्खाग्रष्त क्षेत्र घोषणा गरेको थियो । खानेपानी व्यवस्थापनका अरु योजना बारे कुम्मायक गाउँपालिकाले विभिन्न योजना बनाई रहेको गाउँपालिकाका अध्यक्ष जयबहादुर चेम्जोङको भनाई छ । पानीको खडेरीका कारण कुम्मायक गाउँपालिकामा घरबारी छोडेर जानेहरुको संख्यासमेत धेरै छ । गाउँपालिकाका अनुसार पानीको अभावका कारण करीब एक सय ५० घर ,खाली छोडेर परिवारका सदस्य अन्यत्र सरेको अनुमान गरिएको छ ।

२०७५ चैत्र १६ गते बिहान ९ :३८ मा प्रकाशित