समायोजन खबर काठमाण्डौ,
सत्तारूढ नेकपाका नेता वामदेव गौतमले हेलिकोप्टर दुर्घटनामा निधन भएका पर्यटनमन्त्री रवीन्द्र अधिकारीको निर्वाचन क्षेत्रमा उपचुनाव हुँदा आफू उम्मेदवार नहुने स्पष्ट पार्नुभएको छ । उहाँले आज विज्ञप्ति जारी गरी स्वर्गीय अधिकारीको निर्वाचन क्षेत्र कास्की–२ मा आफू उम्मेदवार हुन लागेको भनेर दुष्प्रचार सुरु गरिएकामा आपत्ति जनाउँदै खण्डन गर्नुभएको हो ।

उहाँले पार्टीले आफूलाई उम्मेदवार बनाउने निर्णय गरेको खण्डमा पनि त्यसलाई स्वीकार नगर्ने विज्ञप्तीमा उल्लेख गर्नुभएको छ ।उहाँले मृत्युको शोकबाट आफूले व्यक्तिगत लाभ लिने काम कहिल्यै नगरेको र अब पनि नगर्ने उल्लेख गर्नुभएको छ । गौतमले रवीन्द्रको खाली भएको निर्वाचन क्षेत्रमा उहाँकै परिवारबाट उम्मेदवार बनाउनुपर्ने धारणा समेत अघि सार्नुभएको छ ।
२०७५ फागुन १८ गते साँझ ६ बजे प्रकाशित