चिसाङ शेर्पा बिराटनगर,
एक नम्बर प्रदेश स्तरीय कराते प्रतियोगिताको ७५ केजी पुरुष कुमितेतर्फ मोरङ फाईनलमा प्रवेश गरेको छ । आठौं राष्ट्रिय कराते प्रतियोगिताका लागि बिराटनगरमा भइरहेको प्रतियोगितामा मोरङ र सुनसरी फाईनलमा पुगेकोे हो ।

मोरङ जिल्ला सितोरियो कराते संघ र पुर्वाञ्चल क्षेत्रिय विकास समितिको आयोजनामा बिराटनगरस्थित शहिद रंगशाला कभर्डहलमा गत मंगलबारबाट सुरुवात भएको तीन दिवसीय प्रदेश स्तरीय कराते प्रतियोगिताको तेश्रो दिन बिहीबार ७५ केजी तौल समुहमा मोरङका सल बहादुर गुरुङ र सुनसरीका रोशन धामी फाईनलमा पुगेका हुन् । खोटाङका सुजन राई र धनकुटाका रवि खत्रीले कास्य पदक जितेका छन् ।
यस्तै,आजै भएको ५५ केजी तौल समुह पुरुष कुमितेमा मोरङ र झापा तथा ६० केजी तौल समुह कुमितेमा खोटाङका सन्तोष राई र मोरङका किशोर कोइराला फाईनलमा पुगेका हुन् । ५५ केजीमा आविष्कार राई धनकुटा र आशिष तुम्बाफे पाँचथर तथा ६० केजीमा इलामका सविन मगर र तेह्रथुमका मन कुमार राईले कास्य पदक जितेका छन् ।

यसैगरी, बुधबार भएको ५० केजी तौल समुह पुरुष कुमितेमा मोरङका महेश यादव र ओखलढुंगाका मिलन राई फाईनलमा पुगेका छन् । भोजपुरका शन्देस राई र झापाका अरुण कुमार लिम्बुले कास्य पदक जितेको छ । महिला पुरुष कुमिते प्रतियोगिताको फाईनल खेल भोली (शुक्रबार) गराइने आयोजकले जनाएको छ । प्रतियोगितामा (स्वर्ण) जित हासिल गर्ने खेलाडीले प्रदेश नम्बर सातको कञ्चनपुरस्थित महेन्द्रनगरमा हुने आठौं राष्ट्रिय प्रतियोगितामा स्पर्धा गर्न पाउनेछन् । ‘आठौं खेलकुद हाम्रै प्रदेशमा, पसिना र पौरख आफ्नै देशमा’ भन्ने नाराका साथमा १७ स्वर्ण, १७ रजत र ३४ कास्यगरी ६८ विधामा प्रतियोगिता भइरहेको छ । १७ स्वर्ण पदक जित्ने खेलाडी राष्ट्रिय प्रतियोगितामा जानेछ । प्रदेश स्तरीय कराते प्रतियोगितामा १४ जिल्लाले सहभागिता जनाएको छ ।
२०७५ फागनु ९ गते राती ८ :०४ मा प्रकाशित