चिसाङ शेर्पा बिराटनगर,
एक नम्बर प्रदेश स्तरीय कराते प्रतियोगिताको महिला कुमितेतर्फ खोटाङ फाईनलमा प्रवेश गरेको छ । आठौं राष्ट्रिय कराते प्रतियोगिताका लागि बिराटनगरमा भइरहेको प्रतियोगिताको ६८ केजी तौल समुहमा खोटाङ र इलाम फाईनलमा पुगेकोे हो ।

मोरङ जिल्ला सितोरियो कराते संघ र पुर्वाञ्चल क्षेत्रिय विकास समितिको आयोजनामा बिराटनगरस्थित शहिद रंगशाला कभर्डहलमा गत मंगलबारबाट सुरुवात भएको तीन दिवसीय प्रदेश स्तरीय कराते प्रतियोगिताको तेश्रो दिन बिहीबार ६८ केजी तौल समुहमा खोटाङकी जस्मिना राई र इलामकी समिक्षा लाप्चा फाईनलमा पुगेकी हुन् । मोरङकी रोजिना लिम्बु र सुनसरीकी सुमना राईले कास्य पदक जितेकी छन् । यस्तै,आजै भएको ५५ केजी तौल समुहमा खोटाङकी विद्याकला राई र सुनसरीकी अस्मिता राई फाईनलमा पुगेकी छन्। कञ्चन राई धनकुटा र रिमा लिम्बु ताप्लेजुङले कास्य पदक जितेकी छन् ।

यसैगरी, बुधबार भएको ४५ केजी तौल समुहमा खोटाङकी डुनु राई, पाँचथरकी सोनिया जबेगु र ५० केजी तौल समुहमा इलामकी प्रिती वस्नेत र पाँचथरकी किनारी मेनाङवे फाईनलमा पुगेकी छन् । ४५ केजी तौल समुहमा ताप्लेजुङकी पासाङल्हमु शेर्पा र धनकुटाकी सिर्जना थापा तथा ५० केजी तौल समुहमा सुनसरीकी जिना सुब्बा र झापाकी लिला श्रेष्ठले कास्य पदक जितेकी छन् । दुवै कुमिते प्रतियोगिताको फाईनल खेल भोली(शुक्रबार)हुने आयोजकले जनाएको छ ।

यसैविच, ६१ केजी महिला कुमितेमा सुनसरीकी ईन्द्रमाया तामाङ र संखुवासभाकी संगीता लिम्बु फाईनलमा पुगेकी छन् । संखुवासभाकी विनिता श्रेष्ठ र पाँचथरकी सोनिया काम्बाङले कास्य पदक जितेकी छन् । प्रतियोगितामा (स्वर्ण) जित हासिल गर्ने खेलाडीले प्रदेश नम्बर सातको कञ्चनपुरस्थित महेन्द्रनगरमा हुने आठौं राष्ट्रिय प्रतियोगितामा स्पर्धा गर्न पाउनेछन् । ‘आठौं खेलकुद हाम्रै प्रदेशमा, पसिना र पौरख आफ्नै देशमा’ भन्ने नाराका साथमा १७ स्वर्ण, १७ रजत र ३४ कास्यगरी ६८ विधामा प्रतियोगिता भइरहेको छ । १७ स्वर्ण पदक जित्ने खेलाडी राष्ट्रिय प्रतियोगितामा जानेछ । प्रदेश स्तरीय कराते प्रतियोगितामा १४ जिल्लाले सहभागिता जनाएको छ ।
२०७५ फागनु ९ गते साँझ ७ : ५१ मा प्रकाशित