चिसाङ शेर्पा खोटाङ,
नेपाल विधुत प्राधिकरण दिक्तेल वितरण केन्द्रले १ करोडबढी बक्यौता महशुल उठाउन बाँकी रहेको छ । विभिन्न समयमा बक्यौता महशुल नबुझाउने अटेरी ग्राहकबाट १ करोड ४ लाख ४७ हजार ६७९ रुपैयाँ बक्यौता रकम उठाउन बाँकी रहेको छ । बक्यौता रकम नबुझाउने ग्राहकको गत मंसिर १६ गतेदेखी दिक्तेलबजारबाट लाईन काट्न थालेको प्राधिकरणले हालसम्म २ लाख ६५ हजार ८३७ रुपैयाँ उठाएको प्राधिकरण वितरण केन्द्र दिक्तेलका प्रमुख राम दिनेश यादवले बताए । विभिन्न समयदेखी गएको कात्र्तिकसम्मको मात्रै प्राधिकरणले १ करोड ४ लाख ४७ हजार ६७९ रुपैयाँ बक्यौता उठाउन बाँकी छ ।

विभिन्न स्थानीय सञ्चार माध्यममा सूचना प्रकाशन/प्रशारण गर्दासमेत बक्यौता महशुल नबुझाउने ग्राहकको धमाधम लाईन काट्दै बक्यौता बुझाउनलाई अनुरोध गरिएको प्राधिकरणले जनाएको छ । संबेदनशील संस्थाहरुलाई भने पत्र काटेर बक्यौता बुझाउन अनुरोध गरिएको छ । बक्यौता नतिर्नेमा व्यक्तिगत र औधोगिक बर्गका ग्राहक बढी छन् । बक्यौता उठाउनेसँगै प्राधिकरणले ट्रान्सफर्मरको लोड मिलाउने, मिटर रि,सिलिङको काम गरिरहेको छ । ६ सय ६२ ग्राहकको मिटर प्राधिकरणले रि,सिलिङ गरिसकेको छ । २०५७ जेठ २ गते तत्कालिन प्रधानमन्त्री गिरिजाप्रसाद कोईरालाले उद्घाटन गरेकोे विधुत हालसम्म जिल्लाको साविक ४४ गाविसमा विस्तार भई सञ्चालनमा आइरहेको छ । १२ हजार ३ सय २४ जना यसका ग्राहक छन् ।
२०७५ मंसिर २० गते दिउँसो १: ४६ मा प्रकाशित