समायोजन खबर उदयपुर,
बालिका बलात्कार गरी हत्या गरेको आरोपमा प्रहरीले दुई जनालाई पक्राउ गरी आज सार्वजनिक गरेको छ । उदयपुर रौतामाई गाउँपालिका ३का १३ वर्षीया वालीका एन्जिला खड्काको बाख्रा चराउन जाँदा गत शनिबार हत्या भएको थियो । हत्यामा संलग्न भएको आरोपमा पक्राउ परेका स्थानीय १४ वर्षीय बहादुर राई र १७ वर्षीय विपीन राईलाई जिल्ला प्रहरी कार्यालय उदयपुरले बिहीबार पत्रकार सम्मेलनगरी सार्वजनिक गरेको हो ।

घर नजिकैको जङ्गलमा बाख्रा चराउन गएकी बालिका खड्कालाई एक्लै देखेर बलात्कार गरी उनको हत्या गरेको दुबै जना अभियुक्तले स्वीकार गरेको उदयपुरका प्रहरी उपरीक्षक चन्द्रदेव राईले जानकारी दिए । बाख्रा चराउन गएकी बालिका राति अबेरसम्म घरमा नफर्किएपछि अभिभावक र छिमेकीसहितले रातभरि खोज्ने क्रममा आइतबार वालीकालाई मृत अवस्थामा फेला पारेको थियो । अनुसन्धानको क्रममा प्रहरीले छ जना पक्राउ गरेपनि हत्यामा संलग्न दुईजना मात्र पुष्टि भएपछि पत्रकार सम्मेलन गरी सार्वजनिक गरेको हो ।
२०७५ कार्तिक २९ गते साँझ ७ : ४९ मा प्रकाशित