काठमाडौं । सञ्चार तथा सूचना प्रविधि मन्त्रालयले १५ जनालार्इ पदमुक्तको पत्र थमाउँदै पदमुक्त गरेको छ । मन्त्रालय अन्तरगत विभिन्न निकायका अध्यक्ष र पदाधिकारीसहित १५ जनालाई नियुक्ति बदरको पत्र थमाउँदै पदमुक्त गरेको हो ।

सरकारले १४ भदौदेखि २ फागुनसम्म भएका राजनीतिक नियुक्तिहरु बदर गर्ने निर्णय गरेपछि सञ्चार मन्त्रालयले पत्र काटेको मन्त्रालयका प्रवक्ता रामचन्द्र ढकालले जानकारी दिए । १५ जनालाई नियुक्ति बदरको पत्र दिइएको मन्त्रालयका प्रवक्ता ढकालले पुष्टि गरे।

नियुक्ति बदरको पत्र पाउनेमा नेपाल दूरसञ्चार प्राधिकरणका अध्यक्ष दिगम्बर झा, सदस्य हेमकुमार श्रेष्ठ, गोरखापत्र संस्थानका महाप्रबन्धक बसन्तप्रकाश उपाध्याय, न्युनतम पारिश्रमिक निर्धारण समितिका अध्यक्ष गंगाधर पराजुली, सदस्य गोविन्दबहादुर कोइराला र विमला भण्डारी रहेका छन् ।

यस्तै नेपाल टेलिभिजनका सल्लाहकार किरण चित्रकार, राससका सञ्चालक समिति सदस्य एकराज पाठक, नेपाल टेलिभिजनका सञ्चालक समिति सदस्य गोविन्द धितालले नियुक्ति बदरको चिठी पाएका छन् भने चलचित्र विकास बोर्डकी अध्यक्ष निकिता पौडेल सदस्य विजय देउजा, सेन्सर बोर्डका उमेश खड्का, देवीराम पराजुलीको नियुक्त पनि बदर भएको छ  ।

रासस