समायोजन खबर जेठ/१०खोटाङ,

खोटाङको खार्मीका सबै बिद्यालयमा अंग्रेजी माध्यमबाट पठन–पाठन सुरु गर्ने तयारी गरिएको छ । दिक्तेल रुपाकोट मझुवागढी नगरपालिका–११ का सबै वडामा रहेका बिद्यालयमा अंग्रेजी माध्यमबाट पठन–पाठन सुरु गर्ने पुर्वतयारी स्वरुव आधारभुत तहका अंग्रेजी शिक्षकका लागि पाँच दिने अभिमुखीकरण तालिम सञ्चालन गरिएको छ । गाउँका अभिभाबक बोर्डिङ खोज्दै अन्यत्र जान थालेपछि वडा शिक्षा समितिले वडाका सबै विद्यालयमा कक्षा १ बाट अंग्रजी माध्यमबाट पठन–पाठनको अन्तिम तयारी गरेको हो ।

अंग्रेजी माध्यमको पाठ्याक्रम, पुर्वतयारी, शैक्षिक सामग्रीको तयारी, कक्षा व्यवस्थापन लगायतका बिषयमा शिक्षकको मानसिक तयारीका लागि अभिमुखीकरण कार्यक्रम सञ्चालन गरिएको वडा सचिव चित्र सुबेदीले बताउनुभयो । अंग्रेजी माध्यमबाट पठन–पाठन सुरु गर्नका लागि कक्षा १ मा भर्ना भएका विद्यार्थीलाई अंग्रेजी माध्यमको पाठ्यापुस्तक वितरण गरिसकिएको वडा शिक्षा समितिले जनाएको छ ।