समायोजन खबर बैशाख/२५ खोटाङ,
खोटाङको हलेसी तुवाचुङ नगरपालिकामा एकल महिला नगर समन्वय समिति गठन गरिएको छ । एकल महिलाको हक, अधिकारका विषयमा वकालत गर्न र जिवीकोपार्जनका क्षेत्रमा काम गर्नका लागि नगरपालिकाको संयोजनमा लक्ष्मी राईको संयोजकत्वमा ७ सदस्यीय एकल महिला नगर समन्वय समिति गठन गरिएको हो ।

हाललाई नगरपालिकाको ११ वडामध्ये हलेसी तुवाचुङ नगरपालिकाका–१ देखि ६ का २१ एकल महिलालाई मात्र समेटेर एकल महिला नगर समन्वय समिति गठन गरिएको उपमेयर बिमला राईले बताउनुभयो । अन्य बाँकी वडाका एकल महिलालाई पनि क्रमशः संगठित गरिने नगरपालिकाले जनाएको छ ।

एकल महिलाको भेलाले नगरपालिकाबाट एकल महिलाका लागि विनियोजन भएको ५ लाख बजेटबाट योजना निर्माण गरेका छन् । नगरबाट बिनियोजित रकमबाट ७ एकल महिलाले बालबच्चाको पठन–पाठनका लागि सोलार बत्ती खरिद गर्ने, एक महिलाले व्यवसायीकरुपमा तरकारी खेती गर्ने, एक महिलाले किराना पशल सञ्चालन गर्ने र बालबच्चा पढाउने र बाँकी एकल महिलाले बाख्रा एबं बंगुर पालन गर्ने योजना बनाइएको उपमेयर राईले बताउनुभयो ।