समायोजन खबर चैत्र ५ खोटाङ,
खोटाङको दिक्तेल रुपाकोट मझुवागढी नगरपालिकाले बृहत शैक्षिक सेमीनारको आयोजना गरेको छ । सामुदायीक बिद्यालयको खस्कँदो शैक्षिक गुणस्तर सुधारका बिधि खोज्नका लागि नगरपालिकाले आईतबार प्राध्यपक डा. विद्यानाथ कोईराला लगायतका शिक्षाविद्को सहजीकरणमा शैक्षिक सेमीनारको आयोजना गरेको हो । शिक्षाविद्, नगरपालिकाभित्रका जनप्रतिनिधि, विद्यालयका प्रअ, व्यवस्थापन समितिका अध्यक्ष, शिक्षासेबी लगायत सम्मिलित सेमीनारले शैक्षिक गुणस्तर अभिबृद्धिका लागि नगरस्तरिय शैक्षिक अवधारणा–पत्र तयार पारेको मेयर दिपनारायण रिजालले बताउनुभयो ।

दिक्तेल रुपाकोट मझुवागढी नगरपालिकाभित्र कार्यरत चार श्रोतव्यक्तीले चार वटै श्रोतकेन्द्रको विद्यालय र शैक्षिक गुणस्तरको अवस्था तथा सम्भावनाका विषयमा कार्यपत्र प्रस्तुत गरेपछि सोही आधारमा नगरको शैक्षिक अवधारणा तयार पारिएको हो । नगरपालिकाभित्र हाल ९४ वटा बिद्यालय रहेको छ । प्रदेशसभाका सदस्य राजन राईले उदघाटन गरेको कार्यक्रममा प्राध्यपक डा. कोईराला, डा. बासु सुबेदी, शिक्षाविद् तोया खनाल लगायतले शैक्षिक गुणस्तर सुधारमा पहिलो हात शिक्षककै रहने उल्लेख गर्नुभयो ।

बृहत शैक्षिक सेमीनारले सामुदायीक बिद्यालयको शैक्षिक गुणस्तर बृद्धिका लागि स्थानीय तहका जनप्रतिनिधि, शिक्षक, अभिभाबक र बिद्यार्थीले पालना गर्नुपर्ने आचार संहिता जारी गरेको सामाजिक बिकास समितिका संयोजक बिकास राईले बताउनुभयो ।