डुम्जीकी कपला स्यारखुम्बुला स्याव्रु डेन्दुर

सेाालुखुम्बु २५ चैत

श्यार्वी के, ताम, रिग्स्युङ्ग, डोलुग ताङ किताङनाताङ तिवा यार्गे जोपकी मिग्युल खुन्ने लामा रिन्पोक्षे पेमा थोर्चेन रिन्पोक्षेकी कुडोन चोवोला भकान्जे युवा क्लवकी स्यावु्र डेन्दुर ल्यारिम गोढिक क्यासुङ ।

नाङवा तिवी लो तर्म गोमान्ये ज्युन गोढिक कियी वाउ डुम्जी स्यारखुम्बु जोङ्खाकी जुनवेशी ताङ भक।न्जेकी ल्हाखाङ्गला लो वाङ्गी गोमान्ये ज्युन गोढिक कियी वान् वाई । स्यारखुम्बु जोङ्खा भकन्जे युलआङ जी सखर युलला वतु साङ्गा छ्योलिङ्ग गोन्पाला गो छुवु डुम्जीकी कपला भक।न्जे शेर्पा युथ क्लवकी स्यावु्र डेन्दुर ल्यारिम गोढिक क्याउ यिन् ।

शेर्वी डोलुगकी लु श्यब्रुतिवा यर्गे जोपकी मिग्युल ज्याग्ने भकान्जे युवा क्लवकी स्यव्रु डेन्दुर ल्यारिम गोढिक क्यान डुब वाई । स्यारखुम्बु जोङखाकी सदरमुकाम सल्लेरी सिसिन थाक्रिङ दाशा याङना युलला वतु दि क्लवकी गोमाला युल यार्गे जोपकी लाका नाछोग कियी वान् वाई सिसिन ज्युकी ङिमाला श्यार्वी स्योन्ने तिवी श्यार्वी लु स्यावु्र तिवा ज्येन डोप छल्सिमा युला दि डेन्दुर ल्यारिम गोढिक क्याउ यिन् । डेन्दुरकी च्याई यिन्सिनाङ श्यार्वी रिग्स्युङ तिवा सुङक्योप किरुला रोगराम किते सिने गोढिक क्याउ दि ल्यारिमला स्यारखुम्बु ताङ रामेछाप क्याने छोक्पा जिकी छोक्स्यु लाउ यिन् ।

ल्यारिम थाङपो क्याने छोक्स्यु लिङगु मि अला माङु ताङ ज्युकी लो ला लि सिसिन ल्हाक्पा छोक्पी छोक्स्यु लिङगु नासम ज्याङ वतु स्यारखुम्बु जोङखान्ये सरगोत्पा कार्म रिन्जी श्यावी सुङसुङ । डेन्दुर ल्यारिमला पिके सिृजन शिल युथ क्लव गोली, रातो तारा युवा क्लव गुम्देल, नव बाम्ती भण्डार युवा क्लव, दुकराङ क्याने भकन्जे युवा क्लव क्यानी छोक्पा जिकी छोक्स्यु नाङगु स्यावु्र डेन्दुरला आङ थाङपोला पिके सृजनशिल युवा क्लव गोली, आङ ङिवाला रातो तारा युवा क्लव, आङ सुम्पाला नव बाम्ती भण्डार युवा क्लव दुकराङ क्याने स्यिवाला भकन्जे युवा क्लव ग्याल थुपु यिन् ।

डेन्दुरकी ल्यामिरला थेङ ताङबोला थेन थोपुला पिके सृजन शिल युथ क्लव गोली, पुरस्कार रु तोङ च्याप्के ताङ मुला ट्रफी तङ लखेर, ङिवा रातो तारा युवा क्लव गुम्देल, तोङ च्यिङ्गी ताङ मुला ट्रफी तङ लखेर, सुम्बा नव बाम्ती भण्डार युवा तोङ गु ताङ मुला ट्रफी तङ लखेर, तुक्रङ क्याने सान्त्वना भकन्जे युवा क्लव तोङ ताङ मुला ट्रफी तङ प्रमाणपत्र थोप वेई । दि डेन्दुर ल्यारिमला ग्येलु छोकपा तिवाला ल्यारिमकी कुडोन चोवो याङना साङगा छ्योलिङ्ग ल्हखाङकी लामा चोवो पेमा थर्चेन रिन्पोक्षेकी छ्याग्ने तेरी पुरस्कार गो विन्दु यिन । ल्यारिमला सुङस्येत ज्योकिन लामा रिन्पोक्षे पेमा थर्चेन रिन्पोक्षेकी चिछोग नाङला दा दाक्पी लिुग्सो ताङ रिग्स्युङ तिवा नरी सुङक्योप कि गोउ खाक्छे वतु सुङसुङ ।

दुकराङ क्याने ल्यारिमला ल्यारिम ज्युकडिलकी सुङस्येत ज्योकिन् भकान्जे युवा क्लवकी चिख्याप ल्हाक्पा श्यार्वी श्यार्वी ज्युकी ङिमाला साङ चिछोग नाङन्ये गोठित तिवा दुकराङ क्याने मिमाङ्ग तेरीकी रोगराम छ्युङसुङ सिसिन चिछोग नाङ ल्यारिम तिवा गोढिक कियी ढोप खेलेन क्यासुङ्ग । ल्यारिमला ल्यारिम यार्गे जोपला रोगराम किरु मिमाङ्ग तिवालासाङ ल्यारिमला लखेर नाङ्ने चिकोर क्यासुङ्ग । ज्युकी ङिमाला श्यार्वी स्योनो तिवा दा दाक्पी रिग्स्युङ ताङ लुग्सो तिवा सुङक्योप किरुला गोमा क्यान् युल युलला ल्यारिम नाछोग तिवा गोढिक कियी वान् वाई ।

ADVERTISMENT