३० फागुन, काठमाडौं ।

देशको तराई/मधेस क्षेत्रमा आज धुमधामका साथ फागु पूणिर्मा अर्थात् होली मनाइँदैछ । आइतबार देशका पहाडी जिल्लाहरुमा मनाइएको होली पर्व आज तराईका जिल्लाहरुमा रंग र अबिर छ्यापाछाप गरेर मनाउन लागिएको हो ।

सरकारले होली पर्वकै अवसरमा आज तराईका जिल्लाहरुमा सरकारी विदा दिएको छ । काठमाडौंमा बसोबास गर्ने तराई क्षेत्रका बासिन्दाले पनि आपसमा रंग र अबीर लगाएर होली पर्व मनाउँदैछन् । परम्परागत रूपमा विभिन्न रङ खेली होली अर्थात फागु पर्व मनाउने चलन छ ।

होलीले आपसी सद्भाव, भातृत्व र आत्मीयता बढाउन सहयोग पुर्‍याउँछ । होलीका अवसरमा विभिन्न सांगीतिक तथा साँस्कृतिक कार्यक्रम गरेर खुसी साटासाट गर्ने गरिन्छ ।

यसपालि तराई मधेसका जिल्लाहरुमा आन्दोलन भइरहेकाले अघिल्ला वर्षहरुको तुलनामा यसवर्षको होली केही फिक्का हुने भएको छ ।

होली पर्वको आफ्नै धार्मिक, साँस्कृतिक र सामाजिक महत्व छ ।

दैत्यराज हिरण्यकश्यपुले आˆना पुत्र प्रल्हादलाई मार्ने उद्देश्यले आगोले छुन नसक्ने बरदान पाएकी बहिनी होलिकालाई छोरा सहित आगोमा पस्न लगाउँदा होलिका भष्म भएकी र प्रल्हाद बच्न सफल भएको खुशियालीमा होली मनाउने गरिन्छ ।

होलीका बेला हुन सक्ने सम्भावित दुर्घटना रोक्न तराईका जिल्लाहरुमा प्रहरीले विशेष सुरक्षा व्यवस्था मिलाएको छ ।