धादिङ, फागुन २१
विषाक्त खाना र दूषित पानीका कारण जिल्लाको ज्यामरुङ–७, स्थित दलित बस्ती कुमाइगाउँमा झाडापखालाको प्रकोप फैलिएको छ ।

बस्तीमा मंगलबारदेखि नै झाडा–बान्ता र पखालाको प्रकोप फैलिएको हो । पानीको चरम अभाव भएको दलित गाउँमा करिब सातादिनअघि दर्जन प्लास्टिकका ड्रम राखेर खानेपानी संकलन गरिएको थियो । बस्तीका बासिन्दालाई सोही ड्रमको पानी वितरण गरिएकोमा स्थानीयमा पानीका कारण प्रकोप फैलिएको हो ।

प्रकोपबाट एकै परिवारका १८ जना बिरामी परेका छन् । बिरामी उनीहरूको सदरमुकामस्थित जिल्ला अस्पतालमा उपचारनिम्ति लगिएको छ । बिरामी परेका अन्य कम्तीमा ४० जना भने गाउँमै पीडा खपेर बस्न बाध्य रहेको बिरामीका आफन्त नवराज मजाकोटीले बताए ।

गत बुधबार नवराजको ससुरालीमा जेठान सुरेश नेपालीका छोरा प्रकाशको क्षौर कार्यक्रम थियो । सोही कार्यक्रममा भोज खाएका स्थानीय गाउँले बिरामी परेका थिए ।

उक्त भोजको खाना खाएका सबैजसो स्थानीय बिरामी परेको बताइएको छ ।

हाल १८ जना बिरामीको उपचार भइरहेको जिल्ला अस्पतालकी मेडिकल सुपरिटेन्डेन्ट डा. रसिला अमात्यले बताइन् । डाक्टर रसिलाका अनुसार बस्तीमै पुगेर उपचार गर्न स्वास्थ्यकर्मीको टोली पठाइसकिएको छ ।

उनका अनुसार विषाक्त खानाका काण गाउँलेमा झाडापखालाको प्रकोप फैलिएको हो । ज्याम्रुङको दलितलगायत अधिकांश बस्तीमा खानेपानीको चरम अभाव रहेको छ ।