समायोजन खबर खोटाङ, वाहिनीपति ट्रफीमा रणभीम गण मुडे ब्यारेक खोटाङले तीनवटा प्रतियोगितामा जित निकालेको छ।

रणभीम गण मुडे, दुर्गाबक्स गण ओखलढुङ्गा र पशुपति प्रसाद गण उदयपुरबीच शुक्रबारदेखि सुरु भएको विभिन्न प्रतियोगितामध्ये बास्केट बल, भलिबल र फुटबल प्रतियोगितामा रणभीम गणले जित निकालेको हो।

रणभीम गण मुडेमा आज भएको पुरुष बास्केट बल प्रतियोगितामा रणभीम गणले पशुपति प्रसाद गण उदयपुरलाई २६–६९ स्कोरले पराजित ग-यो।

दुर्गाबक्स गण ओखलढुंगामा भएको पुरुष भलिबल प्रतियोगितामा रणभीम गणले पशुपति प्रसाद गण उदयपुरलाई २–१ को सेटले हराएको छ।

यस्तै, उदयपुरको नम्बर १८ बाहिनीमा भएको पुरुष फुटबल प्रतियोगितामा १ गोल गर्दै रणभीम गणले दुर्गाबक्स गण ओखलढुंगामाथि शानदार जित निकालेको छ।

वाहिनीपति ट्रफी अन्तर्गत नै बैशाख ६ गते रणभीम गण मुडेमा तेक्वान्दो र जुडो प्रतियोगिता हुनेछ। प्रतियोगितामा विजयी हुने टिमले पृतनापति ट्रफीमा प्रतिस्पर्धा गर्न पाउनेछन्।