समायोजन खबर खोटाङ, खकलुङ युनाईटेड क्लब बासपानीले आयोजना गरेको आमन्त्रित फुटबल प्रतियोगितामा बाक्सिला फुटबल क्लब ‘ए’ च्याम्पियन बनेको छ।

खोक्मास्थित खेलमैदानमा शनिबार भएको फाइनल खेलमा नेर्पा स्पोर्ट्स क्लबमाथि ४–३ गोल गर्दै बाक्सिला च्याम्पियन बनेको हो। च्याम्पियन बनेको बाक्सिलाले ६० हजार र उपविजेता बनेको नेर्पाले ४० हजार नगदसहित ट्रफी, मेडल र प्रमाणपत्र प्राप्त गरेका छन्।

प्रतियोगितामा बाक्सिलाका रोहन परियार उत्कृष्ट गोल रक्षक बन्दा नेर्पाका सुरज राई धेरै गोल गर्ने खेलाडी बने। वेष्ट प्लेयर बाक्सिलाका यलम्बर राई बनेका छन्। उनीहरुले दुई हजारका दरले विधागत पुरस्कार प्राप्त गरे।

विजयी टिमलाई केपिलासगढी गाउँपालिका उपाध्यक्ष गुरुराज राई, निवर्तमान गाउँपालिका अध्यक्ष कृष्णकुमार राई र प्रमुख प्रशासकीय अधिकृत सौधन राई लगायतले पुरस्कार वितरण गरेका थिए।

४ बैशाखबाट सुरु भएको प्रतियोगितामा खकलुङ युनाईटेड क्लब रातो, खकलुङ युनाईटेड क्लब निलो, नमुना स्पोट्स क्लब लफ्याङ, पाथेका, बाक्सिला फुटबल क्लब बी र मामत्तिम युवा क्लब खार्ताम्छासहित आठ टिम सहभागी थिए।