समायोजन खबर खोटाङ, अन्तरपालिका स्तरीय राष्ट्रपति रनिङ शिल्ड जिल्ला छनौट प्रतियोगिताको मिति टुंगो लागेको छ।

१४ औं अन्तरपालिका स्तरीय राष्ट्रपति रनिङ शिल्ड जिल्ला छनौट प्रतियोगिता १५ फागुनदेखि १७ फागुनसम्म दिक्तेलस्थित स्थानीय माटिकोरे खेलमैदानमा हुनेछ।

प्रतियोगिता सम्पन्न गराउन कोशी प्रदेश खेलकुद विकास वोर्डबाट चार लाख २० हजार बजेट प्राप्त भएको जिल्ला खेलकुद विकास समिति खोटाङका कार्यालय प्रमुख लिलाभक्त केसीले बताए।

प्रतियोगितामा सितोरियो कराते, तेक्वान्दो, भलिवल, एथलेटिक्स, कबड्डी र उसु विधाबाट महिला पुरुष खेलाडी छनोट गरिनेछ। प्रतियोगितामा प्रथम हुनेले नगद १५ हजार, दोश्रो हुनेले १२ हजार र तेश्रो हुने नगद ९ हजार पुरस्कार पाउनेछन्।

अन्तरपालिका स्तरीय छनोटलाई मध्यनजर गरेर जिल्लाका दुई नगरपालिका र आठ गाउँपालिकाले अन्तर मावि राष्ट्रपति रनिङ शिल्ड प्रतियोगिताहरु गराईसकेको छ।