चिसाङ शेर्पा बैशाख/७ खोटाङ,
खोटाङमा एक वर्षमा चट्याङ लागेर तीन जनाको मृत्यु भएको छ । विभिन्न समयमा हावाहुरी मेघगर्जनसहित परेको चट्याङले गएको वर्षमा तीन जनाको मृत्यु भएको हो ।

जिल्ला प्रहरी कार्यालय दिक्तेलका अनुसार २०७४ बैशाख २३ गते दिक्तेल रुपाकोट मझुवागढी नगरपालिका–५ लफ्याङका ४३ वर्षीय शेर बहादुर कट्वाल, गत चैत्र २१ गते सोही नगरपालिका–२ सोल्मा ओखरबोटका ६२ वर्षीय सम्बर वहादुर दाहाल र साकेला गाउँपालिका–२ रतन्छाकी ५५ वर्षिय वाल कुमारी खत्रीको एकै दिन मृत्यु भएको थियो ।

गएको वर्षमा विभिन्न समयमा चट्याङ लागेर घाईते बनेका दिक्तेल रुपाकोट मझुवागढी नगरपालिका–४ खाल्लेकी ७ वर्षीय सुस्मिता खत्री, ७ वर्षीय सुस्मा खत्री, लफ्याङकी ४५ वर्षीय प्रविना श्रेष्ठ र साकेला गाउँपालिका–२ रतन्छाका ६४ वर्षीय प्रेम वहादुर खत्री उपचारपछि घर फर्केका छन् ।

यस वर्ष चट्याङकै कारण ओखलढुंगा घरभई शसस्त्र प्रहरी वल हलेसी गुल्म दिक्तेलमा कार्यरत जवान यूवराज वि.क अझै वोल्न नसक्ने गम्भीर अवस्थामा छन् । गत बैशाख ३ गते चट्याङ लागेका विकको जिल्ला अस्पताल दिक्तेलले काठमाण्डौ रेफर गरेकोे थियो ।  यस्तै, दिक्तेल रुपाकोट मझुवागढी नगरपालिका–४ खाल्लेका १८ वर्षीय प्रेम बहादुर कट्वाल र रावावेशीं गाउँपालिका–१ कुभिण्डेकी ७५ वर्षीय चन्द्रमाया तामाङ घाईते भएका थिए ।