चिसाङ शेर्पा फागुन/२१ खोटाङ,
जिल्लाको पहिलो नगरपालिकाको नाम हेरफेर भएपछी नयाँ नामबाट काम शुरु भएको छ । पुरानो ‘रुपाकोट मझुवागढी नगरपालिका’को नामको अगाडी ‘दिक्तेल रुपाकोट मझुवागढी नगरपालिका’ नाम थप भएसँगै नगरपालिकाको सम्पुर्ण काम नयाँ नामबाट शुरु भएको हो ।

स्थानीय सरकार संचालन ऐन २०७४ को दफा ४ को उपदफा ५ बमोजिम नेपाल राजपत्र खण्ड ६७, संख्या ५७, भाग ५ फागुन १४ गतेको नेपाल राजपत्रमा प्रकाशित सुचना अनुसार आईतबारदेखी दिक्तेल रुपाकोट मझुवागढी नगरपालिकाको नामबाट कामकाज शुरु भएको नगरपालिकाका उप–मेयर बिनादेबी राईले बताउनुभयो ।

एक कार्यक्रमको आयोजनागरी उप–मेयर राईले नयाँ नामको साईनबोर्ड, लेटरप्याड, छाप औपचारिक रुपमा शुरु भएको घोषणा गरेकी हुन् । नगरपालिकाको पुरानो बोर्डलाई बिस्थापित गर्दै आईतबारदेखी नयाँ साईनबोर्ड राखिएको र १५ वटै वडाबाट काम शुरु भएको नगरपालिकाले जनाएको छ ।

यस्तै, फागुन १४ गतेको नेपाल राजपत्र अनुसारनै दिप्रङ गाउँपालिकालाइ दिप्रङ चुईचुम्मा गाउँपालिका नामाकरण भएसँगै त्यहाँ पनि नयाँ नाम तथा लेटरप्याड, छापबाट काम शुरु भएको छ ।