समायोजन खबर खोटाङ, खोटाङमा प्रहरीले आठ वर्षदेखि फरार रहेका ट्याक्टर चालकलाई पक्राउ गरेको छ। वराहपोखरी गाउँपालिका–१ वराहपोखरीका सन्तोष भनिने दिल बहादुर परियारलाई पक्राउ गरेको हो।

परियारले २०७२ फाल्गुण १५ गते चलाएको को १ त १९८० नम्बरको ट्याक्टर वराहपोखरीस्थित बरबोटे खरबारी पाखामा दुर्घट्ना हुँदा उक्त ट्याक्टरमा सवार वराहपोखरीकै ५९ वर्षीय निर बहादुर मगरको मृत्यु भएको थियो।

घट्नास्थलबाट फरार रहेका चालक परियारलाई खोज तलास गर्ने क्रममा २२ असारमा सुनसरीको धरान उपमहानगरपालिकामा लुकिछिपी रहेको अवस्थामा फेला पारी पक्राउ गरिएको जिल्ला प्रहरी कार्यालय खोटाङका प्रहरी निरीक्षक सूचना अधिकारी बेनु कार्कीले जानकारी दिए।
कार्कीका अनुसार पक्राउ परेका परियार विरुद्ध आज(आइतबार) सवारी ज्यान कसुरमा सात दिनको म्याद थप गरि अनुसन्धान सुरु गरिएको छ।