समायोजन खबर खोटाङ, खोटाङमा प्राकृतिक रुपमा उम्रिएका गाँजा प्रहरीले नष्ट गरेको छ। सामाजिक अपराधलाई नियन्त्रण गर्ने अभियान अन्तर्गत जिल्लाको सदरमुकाम दिक्तेलबजार तथा लफ्याङ र खाल्लेमा गाँजा नष्ट गरेको हो।

जिल्ला प्रहरी कार्यालयबाट खटेका प्रहरी टोलीले मंगलबार बिहान दिक्तेल रुपाकोट मझुवागढी नगरपालिका–१ दिक्तेलबजार, खाल्ले र लफ्याङका विभिन्न स्थानमा रहेका पाखा बारी तथा सार्वजनिक बाटो वरपर प्राकृतिक रुपमा उम्रिएका ३ हजार १०० बोट गाँजा फडानी गरी नष्ट गरिएको प्रहरीले जनाएको छ।

यसअघि, इलाका प्रहरी कार्यालय हलेसीले हलेसी तुवाचुङ नगरपालिका–९ सल्लेको काफ्ले गाउँ, माथिल्लो सल्ले र चिचिङगाको विभिन्न स्थानका खेतबारीमा बेवारिसे अवस्थामा उम्रिएका १६० बोट गाँजा फडानी गरी नष्ट गरेको थियो।