समायोजन खबर खोटाङ, आन्दोलनरत नेपाल कम्युनिष्ट पार्टी नेकपाले बुधबार गर्न लागेको विरोधसभाको प्रचारप्रसारको लागि आज मार्चपास गरेको छ । प्रतिनिधिसभा विघटनविरुद्ध आन्दोलित प्रचण्ड–माधव पक्षले भोलिको विरोधसभा अहिलेसम्मकै वृहत हुने दाबी गरेको छ ।

त्यसको तयारीस्वरूप युवाहरूले काठमाडौमा मार्चपास गरेका हुन् । विरोधसभा अघि भोलि उपत्यकाका ५ स्थानबाट जुलुस निकाल्ने केन्द्रीय संघर्ष समितिले जनाएको छ । पाँचवटै स्थानबाट निस्कने जुलुस मध्यान्ह १२ बजे सुन्धारा पुगेर मूल जुलुसमा परिणत हुने केन्द्रीय संघर्ष समितिले जनाएको छ ।

समितिकाअनुसार ललितपुरको पुल्चोकबाट सुरु हुने जुलुस कुपण्डोल–थापाथली–त्रिपुरेश्वर हुँदै १२ बजे सुन्धारा पुग्ने छ । यस्तै त्रिपुरेश्वरबाट निस्कने जुलुस सुन्धारा हुँदै मूल जुलुसमा, माइतीघरबाट निस्कने जुलुस थापाथली–त्रिपुरेश्वर हुँदै सुन्धारा मूल जुलुसमा, केशरमहलबाट निकस्ने जुलुस दरबारमार्ग–तीनधारा–पाठशाला–जमल–कमलाक्षी–असन–इन्द्रचोक–जुद्ध शालिक–न्युरोड हुँदै मूल जुलुसमा र जमलबाट निस्क्ने जुलुस कमलाक्षी–असन–इन्द्रचोक–जुद्ध शालिक–न्युरोड हुँदै सुन्धारा पुगेर मुल जुलुसमा परिणत हुने बताइएको छ ।

पाँचवटै स्थानबाट निस्कने जुलुसहरु सुन्धारा पुगेर मूल जुलुसमा परिणत भएर बीर अस्पताल–जमल–घण्टाघर–बागबजार–पुतलीसडक–पद्मोदय मोड–प्रदर्शनीमार्ग हुँदै सभा स्थल प्रवेश गर्ने संघर्ष समितिले जनाएको छ ।