समायोजन खबर खोटाङ, खोटाङको केपिलासगढी गाउँपालिकाले एसइइमा सबैभन्दा बढी जिपिए ल्याउने एक–एकजना छात्राछात्रलाई पुरस्कार प्रदान गरेको छ।

एसइइमा गाउँपालिकाभरी सबैभन्दा बढी जीपिए ल्याउने छात्रातर्फ थर्पुडाँडा माध्यमिक विद्यालय सप्तेश्वरकी क्याल्सी राई र छात्रतर्फ सोही विद्यालयका शिब कुमार राईलाई एक–एक लाख पुरस्कार दिएको हो।
बैशाख ७ गते पृथ्वी मावि बाक्सिलामा आयोजना गरिएको शैक्षिक मेला कार्यक्रममा पुरस्कार राशीको चेक विधार्थीका अभिभावकलाई प्रदान गरिएको छ। क्याल्सीले ३.३९ र शिबले ३.४५ जिपिए ल्याएका थिए।

विधार्थीहरुलाई सामुदायिक विधालयमा पढ्न अझ अभिप्रेरित गर्ने लक्ष्य राखेर प्रोत्साहन स्वरुप पुरस्कार प्रदान गरिएको केपिलासगढी गाउँपालिका अध्यक्ष समिर राईले बताउनुभयो।
आर्थिक वर्ष २०७९/२०८० देखि नीति तथा कार्यक्रम बनाएर एसइइमा उत्कृष्ट अंक ल्याउने एक–एकजना छात्राछात्रलाई गाउँपालिकाले एक–एक लाख नगद पुरस्कार दिंदै आएको छ।