समायोजन खबर खोटाङ, खोटाङमा पत्रकार चिसाङ शेर्पा र सविना अछामे पुरस्कृत भएका छन्। खोटाङ यातायात प्रालिको दशौं साधारणसभा तथा छैठौं जिल्ला अधिवेशनको अवसरमा उनीहरु पुरस्कृत भएका हुन्।
शुक्रबार दिक्तेलस्थित समिक्षालय हलमा शेर्पालाई यातायात पुरस्कार र अछामेलाई यातायात महिला पुरस्कारबाट पुरस्कृत गरिएको प्रालिका महासचिव रामकुमार हिङमाङले जानकारी दिए। पुरस्कार राशी पाँच/पाँच हजार रहेको छ।
पत्रकारद्धयलाई नेपाल यातायात व्यवसायी राष्ट्रिय महासंघका वरिष्ठ उपाध्यक्ष पुन्यप्रसाद सिटौला(सरोज) र खोटाङ यातायात प्रालिका अध्यक्ष टेकेन्द्र राईले दोसल्ला ओढाई सम्मान पत्र प्रदान गरेका छन्। पत्रकार शेर्पा र अछामेले यातायात क्षेत्रमा कलम चलाएर पु¥याएको योगदानको उच्च मुल्यांकन गर्दै पुरस्कृत गरिएको अध्यक्ष राईले बताए।

दिक्तेल रुपाकोट मझुवागढी नगरपालिका–१३ नुनथालका शेर्पा समायोजन खबर डटकमका सञ्चालक/सम्पादक हुन्। २०६५ सालबाट पत्रकारितामा सक्रिय शेर्पा हिमालय टाईम्स राष्ट्रिय दैनिक र एपीवान टेलिभिजनका जिल्ला संवाददाता तथा नेपाल पत्रकार महासंघ जिल्ला शाखाका सह–सचिव हुन्। अछामे नमस्ते खोटाङ डटकमका संवाददाता हुन्।